政情：扒浴缸「奇幻漂流」中年PI奪造型獎
一連三日嘅國際龍舟邀請賽及壓軸出場嘅名人扒浴缸大賽，終於喺陰晴不定嘅天氣下結束。事前揚言少布上陣嘅民建聯立法會議員陳恒鑌（Ben），尋日化身成榮獲多項奧斯卡殊榮嘅電影主角少年PI搶鏡，同披上老虎皮嘅隊友成功捧走特色造型大獎。中年Ben扒浴缸時亦體驗好似電影一樣嘅奇幻漂流情節，比賽開始時，阿Ben唔知係咪因為心急發錯力，搞到隻浴缸無啦啦「漂流」去其他賽道，幾經辛苦先可以返回原來航線。
「肥鴨」峰爺 太重包艇
至於被視為「沉船」危險人物嘅金融服務界張華峰（峰爺），尋日就頭戴鴨帽身穿鴨衫繼續為港人帶來歡樂。雖然噸位十足嘅峰爺冇一如所料跌落水，但佢同隊友就因為太重磅而令到浴缸唔識郁，即使兩人起勢咁扒，仍然被其他對手遠遠拋離。賽果方面，練習時跌過落水嘅「小學雞」單仲偕憑住後勁凌厲以卅五秒首先衝過終點，肥鴨峰爺就以兩分廿三秒排包尾。
