政情：環局女將「考牌」
擴建三個堆填區嘅撥款申請，後日就要過第一關，喺立法會財務委員會嘅工務小組委員會投票。最新狀況係，連最有爭議嘅將軍澳堆填區都有機會通過，其餘兩個堆填區打鼓嶺同屯門更加唔使講。過關在望，而唔係好似前朝政府咁毫無把握就去立法會闖關，其實係環境局副局長陸恭蕙同政治助理區詠芷總算能發揮效用。
陸恭蕙打動莫乃光撐政府
後日嘅投票傾向如下：手握七票嘅民建聯經過一輪扭擰之後決定支持，而大力反對堆填區嘅葛珮帆身在英國。工聯會聲言反對，但王國興當日有會要開，真正投票反對嘅只有陳婉嫻同麥美娟。除非醫學界梁家騮突然反對，否則堆填區撥款可以十五對十三「險過」。
陸恭蕙有民主派背景，同泛民中人相熟，關鍵時刻就要佢發揮作用，結果今次建制派主要由政務司司長林鄭月娥出面游說，而泛民方面就全部交畀陸恭蕙「統戰」，陸恭蕙本來有一絕招，就係搵咗工黨副主席何秀蘭做中間人，因為兩人九十年代尾已經相識，大家都係走環保路線，非常同聲同氣。陸恭蕙諗住透過何秀蘭統一各泛民政黨嘅「開價」，然後政府可以一次過「回價」，咁就一次撬走十幾票。
但可惜呢招行唔通，惟有逐個逐個政黨約見。好彩陸恭蕙成功打動到資訊科技界莫乃光支持政府，連公民黨都話有得商量，起碼唔係一開始就反對。
區詠芷同環團摸底傾掂數
但要知道陸恭蕙最終係咪「考牌」成功，要睇下有咩泛民投畀政府喇，如果最終喺無泛民支持下都成功通過撥款，就證明咗「陸恭蕙」呢三隻字係浪得虛名。
如果真係夠票通過，仲有另一功臣，就係年輕貌美嘅環局政治助理區詠芷，今次堆填區擴建大家有無發覺，一眾環保團體如綠色和平、地球之友都無出嚟反對呢？聽聞出身自地球之友嘅區詠芷嘅暗地發功，私下同班環保團體摸晒底，大家講好數，令班環團就算唔出聲撐政府，都不大力反對擴建堆填區。大家唔好睇小環團，雖然佢哋無票在手，但佢哋製造嘅輿論無人敢拂逆，如果唔係班環團無出聲反對，民建聯又邊有咁易轉身撐政府呢？