中環出更：白鴿籌劃搞大7．1？
壹傳媒肥佬黎位於何文田嘅大宅早前被人撞閘，但似乎無阻肥佬黎繼續搞風搞雨嘅本性。早幾日我哋已經報道過肥佬黎將屋企當成「搞事指揮部」，邀請民主黨創黨主席「李漢奸」李柱銘、「民主阿婆」陳方安生、天主教香港教區前主教陳日君到佢屋企聚會，估唔到佢尋日又整多場「搞事會議」民主黨版，叫晒幾個民主黨前主席飯聚，七一前搞多咁多嘢，指揮部開會、調度得咁頻密，你話呢班搞事人唔係想指點江山都無人信啦。
肥佬黎尋日朝早七點，已由司機車佢去中環陸羽飲早茶，表面睇佢好似心情麻麻，飲咗唔夠一粒鐘就走人，但原來早走係返屋企籌備「搞事午宴」。
到差唔多中午十二點，搞事幫中堅分子李柱銘率先抵達肥佬黎大宅，過咗無耐，肥佬黎司機揸咗架七人車外出，隔咗十幾分鐘就返回大宅，但車尾座位神神秘秘拉晒窗簾，到落車先知原來係民主黨前主席李永達。後來加埋另一個前主席何俊仁，搞事午宴搭正一點正式開始。
密斟兩小時 豈止午宴
過咗半個鐘，李永達第一個急急腳搭的士走人，剩番其他人留喺「搞事指揮部」密密斟，可能佢哋諗緊點樣催谷七一遊行人數，所以李柱銘同何俊仁足足食到三點鐘至走。
我哋問何俊仁到底餐飯傾咗啲乜，佢就無厘頭話「大江南北」，令件事更撲朔迷離。李柱銘、何俊仁、李永達，三人都係民主黨前主席，無端端同肥佬黎密會傾兩粒幾鐘，如果認為只係食飯咁簡單，就真係太天真喇。
卓妮