功夫茶尋日講過，同人唔同命，同遮唔同柄，小市民為咗貪一蚊幾毫被人告上法庭，又要罰款又要守行為，而前特首曾蔭權爵士貪威識食反而逍遙法外風流快活，所謂法律面前人人平等，其實只係令人無法笑得出嘅爛笑話。嗱嗱嗱，話口未完，又有高官被踢爆知法犯法，又係涉及曾朋友，又係懷疑官官相衞被放生，再咁落去，香港「法治之都」招牌遲早可以當柴燒咯！
呢單猛料由隨《太陽報》附送嘅最新一期《好報》獨家踢爆。話說康文署署長馮程淑儀及其現職機管局企業發展執行總監嘅丈夫馮永業擁有嘅跑馬地一個豪宅單位，天台違規搭建涼亭，打造成空中花園。最離譜嘅係，屋宇署○八年已經向有關單位發出還原命令，業主呢頭還原僭建樓梯，嗰頭僭建涼亭，咁即係擺明當屋宇署無到，知法犯法嘅啫！
更離奇嘅係，屋宇署一○年五月向業主發信確認還原項目已經完成，並明言「必須確保不再進行任何違例建築工程」，否則署方會提出檢控，而根據地政署高空圖片顯示，涼亭早喺一○年已經出現，點解屋宇署當年巡視樓梯復原工程時，對同樣處於天台嘅僭建涼亭視若無睹呢？究竟係有人官官相衞玩放生，定係有人發鷄盲扮睇唔到呀？如果屋宇署提供唔到合理解釋，唔該順手發多一張清拆令畀自己，拆埋屋宇署個招牌啦！
咁大個涼亭都視若無睹，睇怕屋宇署都好難自圓其說，咁啦，等功夫茶幫吓佢哋，最大可能其實係四個字：官官相衞。嗱，係人都知，馮氏夫婦同被公認為貪曾愛將，因而官運亨通步步高升，唔止豪宅天台成功架「亭」疊屋，事業一樣更上層樓。馮宅僭建被揭發之時，正係貪曾打骰港府之日，所謂唔睇佛面都睇「曾」面，屋宇署放生貪曾愛將絕對唔出奇囉。
講開又講，曾朋友僭建黨獲屋宇署法外開恩，早就唔係新聞嘅嘞。就講貪曾自己吖，一一年被東方報業集團踢爆半山單位違例圍封露台，全城聲討，結果左拖右拖，拖足兩個月至不情不願開展清拆工程。而現任平機會主席、前食衞局局長周一嶽仲離譜，一二年五月被東方揭發寓所違規以玻璃板圍封露台，居然可以拖到今年四月底至動工拆卸，話無人包庇，細路仔都唔信啦。
一句講晒，法治不容挑戰，權貴不容僭建。貪曾愛將又好，貪曾混帳又好，任何人違法僭建就要依法處置。當然啦，最能夠守護法治挽回公眾信心嘅做法，就係廉署速速將貪曾繩之以法，如果再任由貪官逍遙法外，香港法治招牌必然同僭建涼亭睇齊，淪為空中樓閣！