政情：黃春平任「創建力量」秘書長
觀塘區議員黃春平自從前年當選後隨即被發現曾做過中聯辦高層後，一直保持低調，鮮有喺公開場合露面，但據聞佢稍後會有新動向，將會出任由觀塘區議會主席陳振彬（Bunny）牽頭成立嘅「創建力量」秘書長。唔知因應新崗位嘅工作需要，黃春平會否一洗過去對傳媒驚青表現，多啲同傳媒「打交道」呢？
黃錦超做副主席
包攬九龍東三十多名獨立區議員嘅「創建力量」，將喺本月二十九日正式開張，佢哋搵咗立法會議員謝偉俊做顧問，另外正副主席共五人，包括主席Bunny，副主席就由黃大仙區議會副主席黃錦超擔任。不過，最令人意想不到嘅係，佢哋搵咗黃春平做秘書長，換言之「創建力量」嘅大小事務，都好大機會由黃春平落實執行。
「創建力量」已租用觀塘法院對面嘅工業中心某單位做大本營。至於「創建力量」成立後首要工作，據稱將會主打兩個議題，包括繼續爭取喺啟德興建全科醫院，以及落實喺觀塘興建跨區文娛中心，究竟集合眾人之力會否對地區工作帶來新氣象，大家認真要拭目以待！