政情：新小巴大王涉足水療
好多富豪二代都面對創業難，守業更難嘅問題，繼承家族事業嘅新小巴大王馬亞木兒子馬僑生（Robert）都唔例外，遇上老本行經營前景日趨暗淡嘅境況。不過，佢都好靈活，嘗試多方面發展。Robert繼之前大舉投資舖位物業，最近又涉足水療生意，佢話港人嘅保健意識愈來愈強，呢盤生意應該大有可為。
短時間內不投資物業
Robert話，自最低工資實施以來，營運成本不斷上升，就連輪胎零件，甚至燃油價格都漲幅驚人，但要調整票價就要經過好多關卡，打算增加小巴座位以幫補收入但又不獲批准。雖然小巴業務經營艱難，但Robert並無想過放棄，佢話有啲新市鎮嘅交通配套有待改善，加上巴士公司要重組路線，說明小巴業仍有生存空間。
至於物業投資，Robert話依家內地鼓吹節約，令到個人遊客消費力減弱，香港嘅零售市道經已見頂，連帶舖位租金亦無復當年勇，所以佢未來一段日子都唔會投資物業，難怪佢今年初喺銅鑼灣大搞水療生意喇。