政情：咖喱飯哪吒鬥紮炮
立法會新界東議席一向競爭激烈，再細分以西貢區鬥得最激，當中尤以有「哪吒」之稱嘅當區議員方國珊同身兼立法會議員范國威（咖喱飯）鬥到死去活來。近年佢哋就將戰場放喺擴建將軍澳堆填區議題上，先有年前哪吒去中環跳海抗議，之後大家又玩剃髮，近日嘅最新策略仲玩到絕食添，唔知下一輪又有乜嘢新作喇，唔通哪 吒真係要好似中國神話中嘅哪吒咁削肉？
爭新東議席出盡法寶
雖然哪吒失落今屆立法會新界東議席，但佢係西貢區得票最多嘅候選人，所以一啲都唔可以睇小，而咖喱飯若要保住議席，當然唔可以鬆懈啦！唔知係咪呢個原因，佢哋喺立法會即將表決嘅擴建三個堆填區問題上出盡法寶，一直有跟進堆填區問題嘅哪吒就宣布會「絕食」反對擴建將軍澳堆填區，而咖喱飯亦聯同其他泛民主派區議員展開「斷食」行動，唔知最後邊個激啲，引起多啲公眾嘅注意呢？
兩人宣傳海報勁相似
不過，睇番咖喱飯同哪吒嘅宣傳海報，兩張都係黑底白字，而文字嘅附近再加幾滴紅色嘅油漆，相似度有九成，真係唔知邊個抄邊個喇！當中稍為有啲唔同嘅，就係咖喱飯話要「斷食」，而哪吒就話要「絕食」。不過，究竟「斷食」同「絕食」有咩分別呢？我哋翻查網上資料，有網民解釋話，「斷食」可以話係鍛煉身體、心理及靈性嘅方法，期間可以飲用液體飲料，而且係有限期嘅。「絕食」係一種抗爭，可以無限期咁唔食嘢。
其實哪吒一向都行慣激進路線，佢前年亦就政府擴建將軍澳堆填區計劃，到中環跳海以示反對，最後仲要消防處出動蛙人幫佢返上岸。至於咖喱飯亦做慣啲出位行動，最令人記得嘅莫過於佢早前喺特首公布施政報告時，大玩行為藝術。所以，如果真係要爭取曝光嘅話，唔夠激都咪旨意搞得掂，今次嘅絕食同斷食行動咁相似，最多都係打平手，或者佢哋要諗啲更激嘅方法，唔知佢哋有冇諗過去堆填區紮營抗議呢？