葵芳邨曬被礙觀瞻
王先生日前到葵芳邨探訪親友，發現邨內多處均張貼「嚴禁曬晾」告示，但不少通道與公共空間仍被「衫海」、「被海」淹沒，當中尤以葵德樓附近欄杆更屬「重災區」。王先生質疑房屋署對違規情況視若無睹，「搞到成條邨都係被同衫，完全冇人理，咁啲告示貼嚟做乜？」
房署首設容許晾曬日
葵芳邨物業服務辦事處發言人指出，葵芳邨人口眾多，晾曬需求殷切，住戶已獲得屋邨管理諮詢委員會同意，可於指定晾曬期內在指定地點晾曬衣物，但所有遊樂及休憩設施均不得晾曬。發言人又稱，今年首次容許晾曬日期為六月一日至十八日，住戶可於該時段內在指定公眾地方晾曬衣物。
「我五月尾去嗰度探親戚，咁即係啲住戶偷步拎啲嘢出嚟晾啦！」王先生稱，理解到公屋住戶或缺乏足夠空間晾曬，但認為亦需自律，保持社區整潔，同時要求房署探討可行方法，在屋邨環境整潔與住戶晾曬需求間取得平衡。