筍工周圍有，香港特別多，最明顯嘅例子莫過於平等機會委員會主席呢一個高薪厚職，唔理你一塌糊塗又好，唔理你三尖八角都好，基本上阿貓阿狗全部有機會出任。
喂，平機會主席一職月薪超過二十萬元o架，理論上應該由有識之士執牛耳。可惜非常之咁不幸，歷任主席醜聞多多，乜鬼嘢鄧爾邦呀，乜鬼嘢王見秋呀，一個二個由於種種問題而執包袱。至於家陣嘅主席周一嶽，當然亦係備受非議嘅惹火尤物啦，事關呢一位仁兄係前朝曾蔭權政府嘅舊臣，僅有嘅強項係不斷撞板「每周孭一鑊」以及登台獻唱「我忘不了你」，其他正經工作乏善足陳。新官上任把幾火嘅梁朝政府居然循環再造，將周一嶽翻閹為平機會主席，係就係符合廢物利用嘅環保訴求，不過始終令人覺得所託非人。簡單咁講，低能者登上高位階，得享非一般嘅超凡待遇，唔係筍工係乜呢，請問？
筍工哥一方面自己被翻閹，另一方面佢居然打算翻閹平機會一個已被廢置嘅舊職位喎，諗落都相當搞笑。上任不足三個月嘅周一嶽首次以主席身份出席立法會政制事務委員會，開會途中一邊猛咁呻窮，一邊企圖浪費公帑。佢話喎，平機會即將冇錢使，今年財政仍然健全，下年就要動用儲備。至於企圖浪費公帑到底係乜意思呢？佢話未來半年將會內部諮詢，研究是否重新招聘行政總裁職位，專責處理平機會嘅內部行政事務。
冇錯，平機會成立初期本來係設有行政總裁一職嘅，相等於首長級第三級職位，月薪超過十萬元。平機會於○○年取消咗呢一個職位，原因係精簡架構以及節省開支。特區政府先後於○四同○九年提出重設職位，方便將平機會主席嘅執法同行政職能分家，不過兩次都受到人權組織反對，不但質疑浪費公帑，而且可能削弱平機會主席喺維護人權方面嘅職能，令平機會變成行政主導。
呢嗱嗱嗱，你話係咪荒謬吖？呢頭話平機會窮到冇錢使，嗰頭又要翻閹舊職位，每個月至少一擲十萬元。打個譬喻吖，萬一有個黃臉婆師奶同老公講，屋企冇錢開飯呀，不過為咗減輕工作量，不如請個菲傭打理家頭細務吖，老公聽完大概怒髮衝冠，左一巴右一巴摑到個黃臉婆師奶五官移位，話唔定仲要喺地下執番副假牙。
講到呢度，大家係咪覺得周一嶽唔要臉呢？既然係咁，功夫茶有一個反建議，重設平機會行政總裁都得，不過條件係取消平機會主席一職，炒咗周一嶽再選賢與能咯喎，咁咪唔算浪費公帑囉！