多年來稅務局都會公布十大繳交最高稅款嘅資料，畀各大媒體玩吓遊戲，估計邊個係該年度交稅最多嘅打工皇帝。不過，由今年起，打工皇帝嘅收入將永遠成為秘密，因為稅務局唔會再公布有關資料，以免造成不必要嘅猜測。咁究竟係咪有「打工皇帝」向稅務局投訴呢？稅務局回應話：「唔係！」但就補充多句，即使傳媒入紙查詢都唔會再提供相關資料。
如果唔係有「打工皇帝」投訴，有人就猜測係咪稅務局近期忙於處理徵收額外印花稅、逃稅個案、甚至應付有人發起喺第二期稅少交十元嘅行動，因而令工作量大增，所以就要減少啲工作呢？抑或係唔想塑造咁多打工皇帝出來，避免社會出現更多仇富情緒呢？
無論上述揣測係真係假，其實稅務局真係好忙o架，點解？事關稅務局新局長黃權輝明日上任，我哋想約佢做訪問，點知稅務局都話唔做，仲話喺明年五月一年一度嘅稅務局記者會先至同局長見面喎。大家冇聽錯，係明年五月先至見大家。老實講，呢個政府「熱廚房」咁熱，明年見唔見到局長都好難講呀！