政情：公民講場：大劉似攬彈 出庭爆大鑊？

捲入澳門世紀巨貪奇案嘅華人置業主席劉鑾雄（大劉）前日第四度以健康為由拒絕到澳門出庭，令呢單拖足九個月嘅世紀巨貪案依舊膠着。不過，稱病缺席嘅大劉當日卻風騷現身，健步如飛咁同家人到灣仔富豪飯堂食飯。表面上澳門司法部好似冇晒佢符咁，但當中係咪涉及有人包庇，有人唔想大劉過澳門應訊爆大鑊，咁就好難講喇，事關一直有人指時任特首嘅「貪曾」曾蔭權爵士同時任廉政專員嘅「貪湯」湯顯明，甚至係更高層嘅領導人都可能牽涉在內。如果上述嘅質疑屬實，換句話大劉就好似攬住「炸彈」喺身，一旦出庭就會令政商界千絲萬縷嘅黑幕曝光，牽連甚廣。