先後出任過財經事務及庫務局局長、商務及經濟發展局局長嘅馬時亨（肥亨），自從退出官場後就甚少擔任公職。但世事嘅嘢好難講，尋日就有報道話政府會提名肥亨做港鐵董事，仲話委任馬時亨做董事只係第一波，最終目的係鋪路接替錢果豐做港鐵主席。不過，做主席呢個講法咁長遠，到時係咪佢做根本冇人知。
現任港鐵主席錢果豐嘅任期去到二○一五年屆滿，屆時佢就做咗十二年主席，夠晒鐘換人。有傳話港府已經有心水人選，但唔可以到臨任期滿先委任，決定先安插心水人選做住港鐵董事，等佢慢慢摸熟內部運作，再接錢果豐個位。而政府會喺月底舉行嘅港鐵董事局會議中，提名三人成為新任港鐵董事，除咗肥亨外，仲包括前消委會總幹事陳黃穗及前運輸署副署長陳阮德徽。
論資歷，肥亨做過問責局局長，喺商界仍有一定地位，到依家仲係好多間上市公司嘅董事。論經驗佢亦唔差，任內一手促成兩鐵合併，港鐵主席對佢嚟講應該無乜難度。不過，有講法話，依家只係提名階段就爆出消息，相信有人想相關人士「見光死」。我哋曾聯絡過肥亨，佢話不予置評。