政情：鄉議局變賣家當仲慶祝
新界鄉議局尋日正式宣布成功出售九龍塘舊址，之後就搞咗六圍盆菜宴。變賣家當還債仲慶祝，係咪唔太好呀？唔通因為執番身彩要食番餐？
稱畀機會同傳媒交流
其實沙田石門鄉議局新大樓雖然內部工程甩漏多，但建築費都用咗近二億元，搞到大家為咗呢座大樓嘅營運及工程費頭都大埋，借落一筆街數不特止，仲頻頻收律師信。所以鄉議局主席劉皇發（發叔）同副主席張學明由去年十二月開始，就四出撲水。不過，鄉議局尋日舉行嘅執委會會議，終於正式公布九龍塘舊址經已以一點七八億元賣咗。唔知係咪呢個原因，鄉議局尋日喺執行委員會會議結束後，搞咗六圍盆菜宴，話係畀機會各鄉事委員會主席同傳媒交流喎，以後仲會定期搞添。
呢頭賣咗舊址，另一頭就搞盆菜宴，係咪因為賣咗家當先有錢呀？攞住杯紅酒嘅發叔就話，盆菜都唔係好貴啫，鄉議局點都夠錢畀，以前鄉議局仲喺九龍塘嘅時候，定期搞嘅聚會仲貴啦，嗰時會開法國名酒Lafite飲添。咁發叔飲緊嗰杯係咪Lafite嚟o架？發叔就話，依家買嘅只係普通紅酒喎。