政情：民記五老歸園田居?

橄欖象哥阿謙仲未肯退

民記依家有十三個立法會議員，如果現任議員全部喺二○一六年立法會選舉連任，當中有五人參選時將年屆六十五歲或以上，包括葉國謙（阿謙）（六十五歲）、黃定光（象哥）（六十六歲）、譚耀宗（譚Sir）同陳鑑林（橄欖）（六十七歲）及曾鈺成（六十九歲），而且譚Sir仲兼任主席，名副其實係老人治黨。

事實上，曾鈺成日前突然表明心迹自爆有意徹底「裸退」，即唔再參選下屆立法會同特首選舉，加上譚Sir今年四月黨內換屆時，公開同私底下都曾講過唔想連任黨主席，有黨內中人都估計事非尋常，相信係為將來退下火線做準備。不過，另外三名資深議員橄欖、象哥同阿謙何去何從就變數多多，其中橄欖同象哥自○八年已「放風」有意退下火線，但○八年同一二年兩屆選舉仍未退。

再深入分析，向來排喺橄欖名單之後嘅區議員，包括黃大仙區議員黎榮浩、觀塘區議員洪錦鉉同柯創盛，做咗地區樁腳多年都被視為接班可能人選，加上部分後起之秀好似觀塘區議員顏汶羽等人磨拳擦掌，地區為咗接班繼續陷入各據一方嘅局面。

至於象哥方面，一直有傳接班人係做過香港青年聯會主席嘅許華傑，但最後停留喺議論階段無疾而終，最近又傳出象哥可能下屆交棒畀青年民記主席周浩鼎，係真係假認真無人說得準。

空有口號 新人嘆難上位

另外，黨內時有聲音要求葉國謙退位畀新人上位，凡此種種都睇得出民記求變呼聲日益壯大，究竟「舊人退，新人上」會否再次淪為「空口號」，部分人會否再次因為等了又等而對黨表示不滿，甚至爆內訌同衝突，咁民記就要好自為之喇！