中環出更：鬍鬚佬自家製「龜苓雞」
潮流興「惜食」，以賣龜苓膏出名嘅「鬍鬚佬」吳耀明都響應，原來佢位於惠州嘅工場，將製龜苓膏時沉澱嘅藥渣餵飼雞隻，減少垃圾量之餘，仲聲稱食到啲雞隻冇病冇痛，唔使怕惹到禽流感。跟住佢又將雞隻嘅「便便」用嚟做肥料種有機菜，形成良好嘅循環系統，慳錢又環保，一舉兩得。
與妻勤運動 擁健康體魄
卓妮日前喺一個場合遇到吳耀明同太太趙鳳儀（Kitty），見佢兩夫婦精神奕奕，一睇就知養生有道。吳耀明話，佢會食番自家出品嘅「龜苓雞」同有機菜，食得健康，加上勤做運動，自然擁有健康體魄。Kitty除咗擅長跳舞，原來玩瑜伽都有一手，難怪佢身材fit到漏。
甚具生意頭腦嘅吳耀明，今年初仲撈埋旅遊生意，安排旅行團到佢內地工場參觀，兼品嘗獨一無二嘅健康餐，推出至今大受歡迎。佢大女吳苑清今年初嫁咗人，問佢幾時有孫抱？佢笑言唔急得，由後生仔話事喎！