中環出更：當選主席 妻懷男胎 啟剛雙喜臨門
香港青年聯會（青聯）前日舉行周年大會，加入青聯第十一個年頭嘅常務副主席霍啟剛以大熱姿態接任第廿一屆主席，仲以三十三歲之齡成為青聯歷來最年輕嘅主席！據可靠消息透露，啟剛同「跳水公主」郭晶晶嘅愛情結晶，會緊隨啟剛九月就職後嘅十月出世，而且仲係男丁添，認真雙喜臨門！
下月一日先正式接棒嘅啟剛滿腹大計，前晚透露未來一年除咗瞓身處理會務，繼續舉辦「愛家日」同招工日等會內原有嘅大型項目外，更有意開設課程，培訓有志從政嘅會員，為社會提供優秀嘅政治人才。唔知啟剛會唔會向曾經擔任立法會議員多年嘅爹哋霍震霆偷吓師，或者邀請政界猛人向熱血會員過兩招呢？
雖然啟剛咁有諗頭，但對從政之路就耍手擰頭，只係笑笑口話「慢慢嚟啦，遲啲先算」，叫卓妮傾番青聯會務咁話。至於郭晶晶腹中塊肉，護妻心切嘅啟剛亦例牌封口，對大家排山倒海嘅祝福都只係以「收到！」作回應，細佬霍啟山亦唔肯透露打算送咩禮物畀姪仔，實行全家上下一心齊齊封口，畀晶晶靜靜哋安胎。
晶晶預產期十月
中華全國青年聯合會（全國青聯）兩年後就換屆，而青聯作為全國青聯嘅跳板，啟剛分分鐘有望更上一層樓，進身全國青聯副主席。
不過，身兼天津市政協嘅啟剛嚟緊十月就會同晶晶添多一個家庭新成員，希望佢兼顧工作之餘，都要抽時間幫手湊仔至得！
卓妮