公務員最叻按機制做事，但今年按機制得出嘅薪酬調整結果就令佢哋唔多滿意，就喺呢個時候，一班公務員忽然發現原來現有機制漏洞處處，高級公務員協會下周會邀約其餘高級公務員代表開會，商討聯署去信特首要求啟動仲裁機制研究加幅結果。
當局約機制外工會交代
高級公務員協會主席郭志德尋日喺電台節目上話，私人機構除咗有現金花紅，仲會以股票期權等形式發放花紅，所以公務員調薪機制要與時並進。至於點解佢哋喺加幅唔理想嘅時候先發現呢個漏洞，郭志德就好坦白話，過往經濟環境好，令佢哋仲未有警覺性，但今次結果出爐時，佢哋就覺得唔多妥，之不過當日一時反應唔切喎。
不過，機制以外嘅公務員工會聯合會總幹事梁籌庭話，其實佢一早就聞到燶味，因為政府年初已放風今年加薪會受公司花紅拖低。佢又話，市民心目中公務員多福利嘅日子已經冇咗好耐，講得俗啲依家公務員嘅薪酬就好似「一碟乾炒牛河，乜叉都無」。佢仲建議行政會議成員喺決定加薪時應該直接同公務員交流，直接了解公務員嘅諗法，仲叫政府唔好好似o氹小學生咁以為讚佢哋兩句就可以收科。據講當局亦不敢怠慢，今日就約埋機制以外嘅四個工會當面交代加薪安排，一改以往只致電知會嘅做法。