喺社交網站上載呢張相嘅發貼人喺網上話，第一批五百個V煞面具到埗，仲有二千五百個嚟緊，將會喺七一派發。發貼人仲話，因面具太貼面，為防刮眼，要喺面具加發泡膠，又要加大鼻孔透氣位，需大量義工幫手。我哋睇番張相嘅家具同擺設，幾經打聽後，發現原來拍攝地點係一位人民力量議員嘅立法會辦公室，莫非人力想動員三千「V煞」喺七一坐馬路示威？
雖然有關人力議員承認張相的確係喺佢辦公室拍攝，亦承認「同V煞啲人有聯繫」，但就唔會評論V煞嘅嘢，而呢批面具亦同人力無關咁話。大家試諗吓，如果七一真係有三千人戴住V煞面具上街，而當中有人涉嫌違法，莫非警方要將三千人帶晒返警署調查？到時嘅惡劣境況真係難以想像。