政情：阿忠帶學生立會補課
立法會議員梁耀忠（阿忠）喺香港仔工業學校兼教高中數學科多年，年屆六十嘅佢將會喺呢個暑假正式退休，前日就趁學生考試前上最後一堂。平日唔多聽書嘅學生面對呢位退休在即嘅梁Sir，上堂都罕有舉手答問題，臨別前更全班起立敬禮，感動到阿忠眼濕濕。
其實阿忠深知學生讀書興趣唔大，過去搞補課叫極都唔郁，所以惟有出動撒手鐧，就係帶學生去立法會補課喇！
爭住報名 去埋訪客禁區
學生聽到有得去立法會當堂醒神晒，成功吸引佢哋爭住報名補課。阿忠話，特別「雙料」身份方便佢帶學生參觀同了解立法會運作之餘，仲可以闖入樓上議員辦事處呢個一般訪客嘅禁區補課，難怪學生咁受落，但呢招似乎有啲公器私用喎。
其實阿忠自九五年加入立法局，議員身份有冇拖累佢嘅教學工作？阿忠自言執教鞭三十年，只係請過兩日病假，事假就更加冇請過，長期服務獎都攞咗幾個喇。雖然據講阿忠喺上屆立法會大會出席率達百分百，但去年就成為唯一冇提出過任何動議或修正案嘅直選議員。阿忠如果下屆想再選，退下教育火線後就要勤力啲喇。