政情：曾爵士外訪 相形見貪
特首梁振英（CY）今次到美國外訪係佢上任後首次到海外進行嘅官式訪問，但原來佢入住嘅酒店房價錢好相宜。相反「貪曾」前特首曾蔭權爵士喺卸任前為咗使盡納稅人血汗錢瘋狂外訪，亦曾到訪紐約，但入住嘅酒店房價錢卻係CY今次入住酒店房十倍，認真係貫徹佢「舔到盡」嘅本色。雖然有人話CY入住嘅酒店有啲寒酸，但紐約市長彭博都願意登門拜會，更反映貪曾豪住總統套房只不過係為咗一己私欲啦！
CY今次到訪紐約，入住嘅係位於市中心嘅商務型酒店Omni Berkshire Place，我哋睇過呢間酒店嘅網站資料，入住一晚最貴嘅七百八十平方呎連客廳套房包埋早餐都係八百一十九美元，折合港幣約六千三百六十元。根據網站照片顯示嘅房間擺設，相信CY今次就係喺呢間套房嘅客廳同彭博見面。
住總統套房嘥公帑
至於喺卸任前貪盡最後一秒鐘嘅貪曾，前年十一月亦曾到訪紐約，當時佢入住當地嘅華爾夫塔樓酒店（Waldorf Towers）總統套房，依家要入住呢間套房嘅話，單係房價一晚都要八千五百美元，即港幣約六萬六千元，係CY今次所住酒店房價嘅十倍。雖然貪曾當時係由該酒店嘅豪華套房免費升級做總統套房，但佢住一晚都花咗公帑港幣逾四萬一千元，相等於當時一名合資格長者領取三年零三個月嘅生果金開支。
其實貪曾豪住酒店又點止紐約之行吖，佢之前都被踢爆任內外訪時，幾乎每次都係入住當地酒店最豪套房，例如前年十一月喺華盛頓時佢就住咗兩晚文華東方酒店（Mandarin Oriental Washington DC）總統套房，花咗公帑十萬五千元。而去年四月卸任前夕，貪曾又出訪巴西，當時佢入住嘅阿爾沃拉達皇家鬱金香酒店（Royal Tulip Brasilia Alvorada）總統套房亦都要五萬二千元一晚。
貪曾曾經藉詞因為要與隨行人員開會，同埋與當地官員見面，所以先入住總統套房。不過，今次CY喺咁「寒酸」嘅酒店會見彭博，正正就引證貪曾滿口胡言，只係用嚟掩飾佢以公帑貪威識食嘅醜行，咁樣揮霍公帑，納稅人真係肉都赤埋，實在令人髮指。