中環出更：徐立之與港大校友同呔同氣
男士領呔款式繁多，好似女士咁「撞衫」嘅機會唔多，但尋日沙田馬場就出現「撞呔」事件喇。話說好多名人同港大校友踴躍出席「港大校友會挑戰盃」賽事，馬會大董陳南祿（Philip）呢位港大校友為咗隆重其事，佩戴一對全球數量不足五十對嘅港大校徽袖口鈕出席，但佢嘅銀色領呔竟然同另一馬會大董廖長江、以及港大校長徐立之嘅款式一模一樣，原來背後有段故事。
徐立之話，兩位馬會大董嘅領呔係由佢送贈嘅，至於呢條銀色校呔係多年前由港大校友事務處設計生產。不過，當時有意見認為呢條校呔予人感覺過於年輕，有欠穩重，反應亦唔理想，於是徐校長就要咗幾條滯銷校呔存放家中，打算日後當作禮物贈予友人。咁啱徐校長早前戴住呢條銀色校呔出席賽馬會社群盃賽，在場賓客大為讚賞，紛紛向佢索取，可惜佢家中只剩下兩條，最後Philip同廖長江先到先得獲贈領呔。
呢條銀色校呔由籮底橙變成搶手貨，徐校長都始料不及。佢又話，港大秉承多元文化，一直以來都無指定嘅校呔款式，所以尋日出席盃賽嘅名人校友，所戴嘅港大校呔有紅有綠。其實以唔損害港大校徽嘅前提下，徐校長話大家都可以製作獨具風格嘅港大校呔喎。講完港大校呔故事，卓妮就轉而追問Philip關於佢有機會擔任貿易發展局主席嘅傳聞，但佢就耍手擰頭話唔評論喎。
金價低迷 鄧鉅明睇唔透
卓妮喺馬場仲見到太子珠寶鐘錶主席鄧鉅明，佢趁機向在場賓客介紹囝囝Alan。近來有意向金飾市場發展嘅鄧鉅明話，各大經濟體猛印銀紙，但金價仍然一蹶不振，實在有違常理，所以佢都睇唔通黃金嘅前景喎。
卓妮