各位親愛嘅讀者，功夫茶想問問大家，平時有冇習慣去公共圖書館偷得浮生半日閒嘅呢？本報最近就做過一次調查，發覺六成半受訪者每個月光顧圖書館嘅次數介乎零至三次，甚至有人聲稱「過去十年從未去過公共圖書館」。
講真吖，香港人嘅閱讀風氣並不興盛，少去圖書館睇書絕對唔出奇。之不過話分兩頭，若然香港嘅圖書館好似外國咁美輪美奐又古色古香，而唔係平平無奇格局死板，藏書種類繁多兼夾博大精深，文盲都可能吸引到入去增廣見聞，話唔定茅塞頓開變成一個自學有成嘅讀書人。
對於受過識字訓練嘅真正讀書人而言，本地圖書館確係相當趕客(口架)，事關讀書人最有興趣嘅係高質素嘅智慧典籍，唔係流行小說，唔係風水命理，唔係烹飪大全。偏偏康文署官老爺為圖書館選購嘅書籍，好多都係呢一類膚淺到極嘅九流讀物，讀書人寧願自費買書返屋企慢慢睇冇咁嬲啦。
即係咁，根據康文署資料顯示，公共圖書館資料被借出總數，由○九年度嘅五千八百二十萬項，減至本年度嘅五千二百四十萬項。至於公共圖書館嘅進館人次，由○九年度嘅四千三百六十四萬，減至本年度嘅四千零十一萬。客仔又少咗，幫襯又少咗，奇怪嘅就係，開支竟然多咗喎，實在莫名其妙。圖書館支出總額○八年大約七億元，本年度預計超過八億元，增幅一成半。
圖書館存在嘅原意係人人有書讀，簡直就係一項希望工程，之不過香港作為一個富裕社會，吸收知識嘅途徑梗係唔止光顧圖書館借書咁簡單，最低限度手機上網已經可以跨越唔少知識上嘅障礙。仲有喎，嫌傳統書本又厚又重咩？無紙作業嘅電子書幫到你，一機在手，群書盡覽。
弊就弊在冇人知道公共圖書館有電子書可借，接受本報訪問嘅市民絕大部分聞所未聞。換言之，康文署宣傳不足，導致圖書館冇發揮到最大功能，年年增加嘅大量開支變成浪費公帑。唔講真係唔知，原來本港公共圖書館嘅電子書總藏量有十四萬項咁多，喺一個冇人知道有電子書可借嘅情況之下，愈多藏量代表愈浪費。
圖書館人流減少唯一嘅好處大概係方便市民入去歎冷氣，你知啦，香港夏天熱到跳舞，喺屋企長開冷氣一來電費貴，二來唔符合環保要求，去圖書館消暑係唔少退休人士嘅好節目。正所謂活到老學到老，功夫茶建議退休人士歎冷氣之餘最好都係順便睇下書，減輕康文署管理不善嘅罪孽吖嘛。