「貪曾」前特首曾蔭權爵士除咗貪盡海陸空、歎盡省港澳外，其實仲出咗名小器兼霸權，喺佢在任期間，已有唔少議員、學者都批評佢以為自己乜都識，又唔肯聽意見，搞到依家香港積壓落咁多住屋、醫療及人口等問題。我哋聽聞直至依家，仍有唔少地區人士對貪曾仍然好不滿，批評佢以前喺推出政策前，成日都唔會預告一聲，淨係會向啲十八區區議會正、副主席直接落柯打。
有地區人士批評，貪曾淨係識得點到班區議會正、副主席陀陀擰，所以搞到唔少正、副主席不滿。佢話，貪曾在任嘅時候，每逢公布施政報告，先至會同各區主席見一次面，而且每次見面都好似係為咗要向佢哋落柯打咁。其中最難搞嗰次，就係貪曾下令各區都要搵地方建骨灰龕，雖然話香港有咁嘅需要，但地區邊有能力突然搵到啲適合、又獲大多數居民支持建骨灰龕嘅地方吖。咁樣將個波拋畀區會，即係大石壓死蟹，要啲民選區議員難做喎。
至於特首梁振英（CY）就好唔同，由競選特首時已經常提及地區行政、下放權力等。上任之後，又不時同十八區正、副主席會面，唔好理CY會唔會參考佢哋啲意見，但係起碼真係有攞起支筆同簿去寫低啲意見，似係肯聽意見。