早前有食肆被踢爆出售無任何牛肉成分嘅牛丸，尋日立法會一個委員會就傾呢單嘢，泛民主派議員要求政府立法規管食物名稱，但一班代表商界嘅功能界別議員，竟然話香港嘅食物千奇百怪，無可能立例規管食物名稱要符合食物內容喎。
飲食界張宇人就話，菠蘿包向來無菠蘿，日式蟹柳都完全無蟹肉，唔通要拉晒班製造商去坐監咩！批發及零售界方剛亦質疑，老婆餅都無老婆，熱狗亦無狗，但如果修例就要呢啲食物全部改名。雖然佢哋表面講到大條道理，但實質係打橫嚟講，依家講緊嘅係牛丸，相信冇咩人會認同牛丸唔係牛肉製造，如果現時無法例監管食物供應商，咁做議員係咪應該建議修例呢？
