政情：田二少籲家長勿偏心
立法會議員田北辰（田二少）上月底嫁女而榮升外父，下個月又輪到大女出閣，認真好事成雙。佢尋日喺電台節目講起同仔女嘅相處之道，就寄語父母千祈唔好偏袒任何一個，仲煞有介事提到，自己家族就係因為有人偏心而令大家都唔開心。唔通田二少暗示當年父母偏心，令佢同大佬田北俊（田少）一度冇偈傾？
父親節全家食西餐
田二少有咁大體會唔係冇原因，記得佢剖白過同田少之間嘅兄弟情，佢話細個嗰陣大佬好錫佢，可惜佢六、七歲起開始好百厭，而父母總係幫住佢而令大佬成日被迫「食死貓」，搞到兩兄弟關係愈來愈疏離。
直至二十年之後，田少專程飛去美國搵田二少傾家族生意，兩兄弟喺沙灘漫步兼真情剖白三個鐘，先解得開呢個長久嘅心結。唔怪之得田二少堅持對四個仔女都一視同仁喇！
星期日就係父親節，雖然田二少少咗啱啱出嫁嘅三女喺夜闌人靜時陪自己食消夜、打牙骹，但全家喺父親節當日，依然會總動員陪佢食至愛嘅西餐，但就可憐鍾情中餐嘅田太要陪佢食鵝肝、飲羅宋湯，仲要直落兩餐咁多。