政情：梁劉柔芬何綺雯攜手 推動創意文化
尋日有間連鎖日本生活用品店喺銅鑼灣某商場裝修後重開，同場開設首間海外餐廳，吸引唔少名人前來先試為快。前立法會議員梁劉柔芬（Sophie）同創意專業協會主席何綺雯（Christie）都有捧場，原來Sophie冇做議員之後，除咗繼續喺志蓮淨苑做「大義工」外，仲忙於同Christie合作，埋首推廣創意文化。
紡織業活動相識
Sophie話，位於中環荷里活道嘅前已婚警察宿舍，年前改建為標誌性創意中心，即將於十一月正式開幕，佢同Christie過去都好努力去爭取。本身做開紡織業嘅Sophie覺得，業界唔單止淨係幫人哋做加工出口，更應該鼓勵本土創意文化，所以年前喺業界一個活動上認識Christie之後，雙方一拍即合，攜手推動創意文化，多年來Sophie更慷慨贊助該會嘅經費。
身為內衣設計師嘅Christie坦言，本港創意產業由於租金貴、空間小、缺乏政府支持等因素，近十年嘅發展停滯不前，被韓國、日本等外來潮流取代，所以佢好希望盡力重振本土創意事業。