教育工作者聯會去年因為出版《中國模式國情專題教育手冊》掀起國教風波，搞到政府一鑊泡。沉寂咗幾個月嘅教聯會又再出動，佢哋就「佔領中環」行動（佔中）向本港中小學教師調查，結果有五成半受訪教師唔覺得佔中會影響社會安定，逾兩成人贊成用以身試法方式爭取政治訴求。佢哋仲打算好似啲爭取普選嘅團體咁自行提出普選特首方案，唔通佢哋又想再倒政府米？
教聯會早前訪問一千一百多個教師，發現五成半人唔覺佔中會影響社會安定，雖有八成三人表明唔會參與佔中，但贊成佔中同表明會參與嘅人都分別有兩成二同一成，甚至有一成二教師係鼓勵學生參與佔中。以調查結果計算，若有百幾個老師去參與佔中認真唔嘢小。
教聯會副主席鄧飛就死撐調查反映大部分教師係理性，唔會參與佔中。不過，佢轉過頭又話，喺學校同學生討論佔中好困難，因為只可以提醒學生佔中可能會犯法，但學生問犯咩法時佢都答唔出。佢咁講，究竟係想凸顯佔中其實可能唔犯法，定係暗批唔得掂嘅教育局局長吳克儉袖手旁觀？不過，最爆嘅係作為教育工作者團體，佢哋竟然話會提出普選方案，仲積極過政府，唔通佢哋都想逼政府快啲做諮詢？