政情：梁唐營疑爆爭位戰
市區重建局因為商品交易所事件而要換人後，下一輪將輪到醫院管理局（醫管局）主席胡定旭同貿易發展局（貿發局）主席蘇澤光因為任期屆滿而要換班，但就疑似掀起梁營同唐營代表爭位戰。有消息話，剛辭去馬會大董嘅醫生李國棟及行政會議成員李國章，會係醫管局主席熱門人選。至於貿發局主席之位，有傳係恒隆集團董事總經理陳南祿（Philip）及工業界立法會議員梁君彥爭奪。
醫管局：李國章vs李國棟
港府一向有不成文嘅「六六規定」，即一位社會人士最多出任六項公職，出任某項公職以六年為限。不過，近年屢次出現例外，好似肥胡就由○四年開始獲委任做醫管局主席，及至去年底再獲延任一年，前前後後將做咗主席九年，所以搵接任人選係刻不容緩，但亦有傳聞佢想爭取繼續留任。早前已傳出港府屬意曾任中文大學醫學院院長嘅李國章出任，一來李國章係梁營中人，加上資歷同經驗都同醫管局脗合，所以被睇好。
另一可能接任醫管局主席嘅可能係李國棟，消息話李國棟喺○六年開始出任醫管局成員，直至去年底先卸任，對於醫管局內部運作熟悉，加上佢喺肥胡手中接任智經研究中心主席，所以被外間視為疑似唐營中人。值得留意嘅係，李國棟早前以公務繁重為由辭去馬會大董一職，未知係咪為咗接任醫管局主席鋪路。
貿發局：陳南祿vs梁君彥
同樣出現疑似梁營同唐營之爭嘅係貿發局主席接任人選。消息話，由○七年開始出任貿發局主席嘅蘇澤光任期將於九月底屆滿，身在紐約嘅佢尋日話，政府至今未曾同佢接觸，但佢強調會「接受任何命運安排」，又指任期不應超逾六年嘅原則應該貫徹執行，暗示會接受離任嘅安排。
一直流傳多名政商界人士都想坐呢個位，其中恒隆集團董事總經理陳南祿，雖然並非梁營，但由於恒隆集團董事長陳啟宗係忠實「梁粉」，或令陳南祿有機會脫穎而出。至於唐營就盛傳多人都有興趣，包括商界立法會議員林健鋒及梁君彥等人，認真係爭崩頭。