中環出更：李應平分享港文化旅遊
台灣文化部駐港機構光華新聞文化中心盛產靚女揸弗人，繼前主任江素惠、路平及才女作家張曼娟之後，現任主任李應平話咁快來港履新已經十個月。精於文化藝術推廣嘅李應平，來港之前係文化部部長辦公室主任，甚受部長龍應台讚許。原來佢同龍應台一樣咁熱衷深度旅遊，獨愛一邊翻尋中西交錯嘅歷史故事，一邊用足迹細味香港嘅一草一木，仲因為喺社交網絡分享相片，而吸引唔少台灣朋友到此一遊。
美景相上載社交網
李應平話，佢鍾意周圍去，發覺香港其實天然地理環境好豐富，例如東壩六角石柱奇觀，佢唔想獨享美景，於是將照片擺上社交網站，結果好多朋友驚呼：香港點會有咁靚地方？佢又去過粉嶺嘅歷史聚落龍躍頭文物徑、荃灣嘅客家文化三棟屋博物館等，盛讚香港嘅歷史及地理資源十分豐富，尤其係夠晒健康嘅深度文化旅遊，相信會十分受歡迎，就好似台灣近年興起嘅單車環島遊一樣喎。