中環出更：救援川震災區 李雲迪助籌款
四川近年屢遇天災，繼數年前汶川大地震後，月前又發生雅安地震。身為重慶人嘅鋼琴王子李雲迪，今晚就會喺尖沙咀舉行「中國鋼琴夢」首站巡迴音樂會，所有門票收入將全數撥捐畀中華基督教青年會（YMCA），支援該會嘅四川災後救援工作。音樂會部分門票更送贈基層家庭，讓佢哋欣賞鋼琴王子嘅絕妙琴音。
李雲迪日前剛完成為期三個月嘅歐洲巡迴演奏，尋日喺北京趕來港，同三十個基層兒童近距離接觸。佢剪咗一頭清爽短髮，西裝骨骨，表現親切友善，大會安排咗個男童表演琴技，佢大讚男童表現自信有水準，仲話好有潛質成為鋼琴家添。
京鄰居吳炎良提議善舉
撮合今次善舉嘅，係李雲迪喺北京住所嘅鄰居吳炎良（Alex），Alex經營健康飲品生意，上月本來打算邀請李雲迪出席佢公司嘅周年活動，咁啱當時發生咗雅安地震，於是靈機一觸，提議將活動改為慈善音樂會為災區籌款，咁有意義，李雲迪當然爽快答應啦。
Alex透露，前晚同李雲迪食晚飯時，提及旗下公司股東之一，正係國際巨星Elton John，李雲迪都話好有興趣同對方來個Crossover喎。至於幾時成事，佢話仲要商量吓，事關一個古典、一個搖滾，要諗吓點夾喇。講番個巡迴音樂會，係李雲迪喺中國首次大規模嘅巡演，總共舉行三十幾場，除咗北京、上海等大城市外，仲深入較偏遠嘅二線城市，將古典音樂帶畀更多人欣賞。
卓妮