禍港七年嘅貪曾，在任期間除了歎盡海陸空、貪遍省港澳，又好似啲購物狂咁，鍾意買到一屋都係嘢，即使用不着就是心裏過癮；貪曾同樣貪到乜都要、乜都啱，好似卸任前密密將價值一百八十萬元嘅公家貴價茅台酒，運去位於半山堅道嘅前任行政長官辦公室（前特首辦）珍藏。
然而，據講貪曾卸任近一年，對呢批天價茅台酒原封不動，可以話係有得睇、冇得飲。有人就話喇：貪曾醜事傳千里，就算佢返到去，又有邊個會陪佢飲茅台呢？要將茅台運走就更難，因為依家佢中港兩邊走，居無定所，啲茅台惟有擺喺前特首辦，擺到千秋萬世囉！佢貪埋貪埋咁多又無得享用，其實貪嚟做乜呢？
老朽又唔係咁睇噃！以貪曾之性格，佢又點捨得拎啲天價茅台同人飲啊！講真，如果佢咁慷慨，呢七十二支國酒不消三、兩個月就畀佢「愛將」貪湯飲鬼晒啦！
再講，茅台畢竟係烈酒，如果貪曾果真飲晒啲茅台，一滴不剩，老朽除了怕佢亂性，更加驚佢貪到更上層樓！
根據英國伊恩‧蓋特萊的《飲酒作樂：酒的文化史》所說，如果沒有酒，古希臘的民主就不會誕生，也不會有喜劇和悲劇。而沒有酒，也很可能沒有美國，因為美國的開國元勳們就是在酒的壯膽下造反的。老朽由此慶幸貪曾沒有「相逢意氣為君飲」，七十二支國酒仍在，否則，佢「造反」有理，不知會貪成乜嘢樣！一晌貪歡，也不過是發吓總統嘅春秋大夢而已！
至於佢「愛將」貪湯，上去立法會帳目委員會三度接受公審，不是廢話就是瞎話，還要義正詞嚴話「深信會水落石出」，嗱！酒入愁腸，唔係化作相思淚，而係相信自己跌落屎坑都會係香嘅！酒之為用大矣哉！貪曾七十二支國酒茅台如果飲咗落肚，中環未被佔領，香港恐已有難矣！