泛民主派成日都批評建制派以蛇齋餅糉籠絡選民，就連政府喺施政報告宣布預留二十億元畀全港十八區推行「社區重點項目」，都畀泛民立法會議員黃碧雲（一舊雲）上綱上線，話擔心政府撥款會淪為畀建制派嘅「官方贊助嘅蛇齋餅糉」，仲要政府承諾撥款唔會成為建制派二○一五年區議會選舉嘅助選工程。不過呢頭話口未完，一舊雲尋日就急不及待咁趕喺端午節前夕派糉畀一班愛民邨嘅街坊，仲慌死人唔知咁喺社交網站宣傳。如果蛇齋餅糉就等於助選工程，唔通喺前年區議會選舉輸咗嘅一舊雲已經開始為下一屆區議會選舉發功？