今年六十六歲嘅立法會主席曾鈺成接受訪問，表明會徹底「裸退」，無意角逐特首之餘，就連下屆立法會選舉都唔玩，提早三年幫自己吹雞完場。曾鈺成解釋話，希望他日塵歸黃土，市民對佢仲存有幻想，想像吓佢做特首可能幾好喎，好過勉強做特首，「跟住哎唷，仲以為佢好掂，原來仲差，咁就死啦！」
對於「裸退」決定，曾鈺成認為若果打算再參選，講嘢就會有太多顧慮同包袱，加上二○一七年自己都成七十歲，「選乜鬼？」可能就係因為冇晒顧慮，佢作為立法會主席，佢膽敢愈講愈多，唔驚大家話佢唔公正，繼早前講行政會議運作引起各方反應，佢今次講政改同佔中。
曾鈺成認為佔中係小事，佢只擔心政改原地踏步， 「如果解決到二○一七問題、如果佔中帶頭人亦滿意二○一七嘅安排，就冇佔中，如果搞唔掂，就唔止佔中咁簡單……」
曾鈺成又話，建制派中人認為搞唔掂咪冇普選囉，有乜咁大不了？佢就覺得唔係，如果二○一七搞唔掂，香港好難管治，又話香港人係好務實，無理由會搞唔掂。唔怪得佢自言，「整整吓我好似變咗民主派。」