政情：英駐港總領事死都唔搬
英國駐香港總領事吳若蘭（Caroline Wilson）上任未夠一年，就畀英國傳媒揭發每月豪花七十二萬港元公帑，租住司徒拔道Opus四千六百呎豪宅，引起英國以至香港輿論嘩然，連環炮轟首相卡梅倫政府浪費納稅人金錢。有英國網民自嘲呢個價月租相當於佢屋企兩年租金，難怪英國咁窮，更有網民強烈要求送佢返鄉下！
英納稅人激憤
事件除咗激親身受其害嘅英國納稅人，就連香港網民都抱不平，投訴根本唔知吳若蘭、甚至歷任總領事任內做過啲乜，即係話總領事根本唔值租住豪宅。群情洶湧，英國駐港總領事館似乎愛理不理，只係重申豪宅有外交用途，總之企硬唔搬。Opus出自建築大師Frank Gahry手筆，近年至落成，外形呈扭紋狀，當然係貴。
其實，回歸後歷任英國駐港總領事都相當識歎，好似頭幾任總領事都以中半山豪宅雅賓利大廈頂層作為官邸，○四年後先移師至深水灣香島道獨立大屋，至前任總領事奚安竹（Andrew Seaton）再改住赤柱村大宅，級數同Opus差唔多，全部都係唔頂級都唔住。