政情：議員去水警總部睇騷
立法會保安事務委員會繼上月底參觀過消防處，尋日又到訪西灣河嘅水警總部，期間仲登上水警巡邏船，觀看俗稱「山貓」嘅高速追截艇進行演練。佢哋喺日光日白之下，睇住兩隻「山貓」模擬夜間追截非法快艇「大飛」嘅行動，放完照明彈又放催淚彈，何其壯觀，可惜出嚟嘅效果同喺陽光下放煙花一樣，無甚睇頭。
白日下放照明彈嘥公帑
話說該會為咗進一步了解水警嘅日常運作，以及感受吓追截「大飛」時遇到嘅風險，決定去參觀水警總部。尋日保安事務委員會涂謹申、林大輝、姚思榮、鍾國斌等七個成員，着晒恤衫西褲，坐住架巡邏船前往大廟灣「睇騷」。當時兩隻「山貓」先投放照明彈對付隻模擬「大飛」，再施放催淚彈夾擊，黃煙四散，場面幾咁逼真。議員們睇到入晒神，仲好雀躍咁用手機及相機影相拍片，一啲都唔介意日光日白之下放照明彈嘥公帑。
做議員真係好，上次佢哋參觀消防處，就試着過「黃金戰衣」，今次又可以睇到咁精彩嘅模擬演練，參加旅行團都冇咁尖端啦。唔知佢哋下次又諗住去邊度參觀，現場感受真實情況呢？