政情：擴建堆填區 民意兩頭擺

黃錦星受命見三區居民

環境局局長黃錦星上任近一年未見大風浪，首次經歷考驗可算係擴建三個堆填區，即使對外放風有「垃圾圍城」危機，各大政黨同政團都未見有轉軚支持港府迹象，尋日終於要由「好打得」嘅政務司司長林鄭月娥披甲上陣，「頭炮」聽取民記約廿名立法會議員同區議員「吐苦水」。據引述，林鄭會上要求黃錦星到受影響三區見居民，又同意以行政措施解決部分問題，包括垃圾車臭味問題，希望喺七月可以再到立法會財務委員會闖關。

林鄭擺平建制派呢場大龍鳳開始上演，不過暫未見民記積極回應，民記官方立場仍然係當局做好前期工作後，先決定擴建堆填區嘅立場，然而民記內部知道目前投票意向「花款多多」嘅情況，絕對需要正視同處理。

票自屯門 譚Sir慎重考慮

消息透露，行政會議成員李慧琼係行會成員，投票時一定要支持政府政策，民記其他議員想統一投票意向至今未見曙光，首先EQ曾私下向黨內兄弟表示，倘民記決定支持擴建堆填區，希望可以申請唔跟隨黨立場投票。EQ其後接受查詢時亦開宗明義話，對擴建將軍澳堆填區「傾向保留」，當問到係咪民記決定支持撥款，EQ都唔支持時，EQ更直言自己投票支持機會好低，似乎EQ有心理準備同黨投票立場唔同。至於民記主席譚耀宗本身票源來自屯門，有民記中人形容，要譚Sir無償地支持政府亦不合理，要如何取得平衡亦好考工夫。

不過話說回來，民記始終係政黨，政黨最重要係黨格，大小事務都可以齊上齊落，所以聽聞黨內有唔少聲音都話，希望視乎情況最新發展，在最後關頭強力游說議員有共同立場，究竟係咪可以成真，相信好快就會有答案。