中環出更：李德麟搞聯誼會團結鄉親
浙江省同鄉會聯合會（下稱浙聯會）青委早前舉行新一屆就職典禮，前主席車弘健功成身退，由常務副主席麥超傑（Joseph）升呢接棒。今屆副主席陣容強勁，包括前全國政協副主席安子介孻孫安宇昭、浙聯會會長李德麟囝囝李惟宏、前會計師公會會長周光暉二公子周鎮忠等人。身兼全國政協嘅李德麟都有到場，佢透露，為進一步團結浙江幫力量，正着手籌設港區浙江省政協聯誼會。
冀藉此為浙江招商引資
有份籌備嘅浙聯會秘書長楊麟振都係浙江省政協常委，佢話，香港現有超過四百名浙江省各級政協，加埋已退任嘅政協前輩，為數多達幾百人。即將出任聯誼會首屆會長嘅李德麟話，依家全球經濟不景，希望藉此平台為家鄉招商引資出力。
當晚Joseph特登請嚟好友兼麥肯錫香港區總經理倪以理（Joe）開講，詳述未來商業領袖嘅特徵。Joe係古物諮詢委員會、金融發展委員會等政府諮詢架構成員，又係社企「鑽的」主席，本身已係領袖樣辦，難怪台下一眾青委聽到如癡如醉。