中環出更：征戰橋牌賽「棋聖」玩過界
睽違香港十六年嘅亞太橋牌聯會錦標賽，上周五喺港島一間酒店拉開戰幔，來自內地、澳洲、印尼、台灣及泰國等近四十支勁旅齊集，有「棋聖」稱號嘅內地第一圍棋高手聶衞平、行政會議成員陳智思嘅姑姐陳鳳翎（Esther）等名人亦現身參戰。東道主香港橋牌協會主席單偉彪話，今次勝出隊伍將取得世界盃橋牌賽入場券，希望港隊有機會取得席位。
聶衞平稱捉棋用腦太多勁攰
開戰首日，盛產世界冠軍嘅中國隊最受矚目，包括女子隊世界冠軍王文霏、馮學鳳及閻茹等。近年着迷於橋牌嘅聶衞平參加長青組賽事，佢嘅牌藝亦十分了得，屢獲殊榮，可謂棋牌雙絕。卓妮趁中場休息時上前同聶衞平傾兩句，佢直認依家打橋牌嘅時間多過下圍棋。唔通佢已打遍天下無敵手，搵唔到旗鼓相當嘅對手，索性挑戰橋牌？聶衞平好謙虛話唔係，事關捉棋時用腦力計算太多，太攰喇，所以咪玩多啲橋牌囉！卓妮見佢一邊傾偈，一邊若有所思，好似仲未抽離牌局，「棋聖」認真唔易做。
身為泰國華人首富陳弼臣孫女嘅Esther，不僅係泰國代表隊，亦係主辦機構亞太橋牌聯會會長。Esther話，佢醉心橋牌已逾三十年，今次嚟香港出賽，亦會趁機與哥哥陳有慶一家人相聚。
今次香港共有三支隊伍出賽，包括友邦保險非執行主席謝仕榮、新聞處助理處長林羅寶蓮及老公林蔭等人。林太由大學開始就迷上橋牌，亦曾代表香港出賽，後來因為工作及家庭兩忙而淡出，直至最近兩年先至重出江湖。佢試過同牌藝高深嘅老公搭檔，勇奪亞太區冠軍添。賽事預計於十六日結束。
卓妮