房署卸責滲水租戶慘情
公共屋邨列入租置計劃後，未有買入單位的租戶慘變孤兒仔！屯門良景邨有租戶被指單位滲水，前年已按管理公司要求施工維修。近日管理公司指滲水依舊，更堅稱「冇做過工程」，房署卻以屋邨已出售為由拒絕跟進。經本報介入後，管理公司才改口承認曾到單位施工。關注團體直指管理公司行政混亂，又狠批房署未有盡業主之責，令租置屋邨租戶求助無門。
周先生一家租住良景邨良俊樓單位逾九年，管理公司於二○一一年指下層單位天花滲水，須在周之單位進行重鋪廚、廁地台工程，周當時亦作配合。
促「良景」安排暫居地
然而，近日管理公司竟再次要求入屋施工，周坦言大感滋擾，「上次個工程搞咗半日，又鑽又掘，已經好唔方便，今次仲話要做足兩日，叫我哋一家大細喺邊度瞓？」周同時不滿工程質素欠奉，無法解決滲漏問題。
為了解施工詳情，周曾向管理公司了解，職員的回應卻令周大感錯愕，「我問佢點解又要做工程、係咪上次出咗問題，佢哋居然話『你個單位從來冇做過工程』，仲話完全冇紀錄，有冇搞錯？」
周不滿管理公司「亂嚟」，遂向房署投訴，未料房署竟以良景邨已列「租者置其屋計劃」為由拒絕跟進，「有啲單位係賣咗，但我仲係租戶，前年話要做工程嘅信我仲留番，房署明明係業主都唔理我，咁仲有邊個幫到我？」
良景邨租戶服務辦事處發言人回應本報查詢時，最初仍堅稱「從未在周先生單位進行任何地台防漏工程」，僅稱今年初接獲住戶通知，指周之單位廚、廁天花滲水，認為有需要在周之單位進行重鋪廚、廁地台防漏工程，惟未得戶主同意施工。
回覆前言不對後語
不過，在本報追問下，發言人於數天後又突然承認曾於二○一一年進入周之單位施工；但對前言不對後語一事，發言人則未有解釋。
「入屋做工程唔係小事，做咗都可以話冇做過，你話管理公司嘅行政有幾咁混亂？」公屋聯會主席王坤認為管理公司應盡快交代事件，以釋當事人疑慮，「就算係無心之失，做錯就要認，最緊要係要搞清楚件事，等樓上樓下都住得安心！」王坤又批評房署出售屋邨後，即將租戶棄如敝屣，令租戶慘變「孤兒仔」，直指房署作為業主，絕對有責任協助租戶解決問題，「好似房署要喺租戶單位度做工程，一般都會安置住戶去同區空置單位暫住，點解租置邨租戶就冇咁嘅安排？」
記者：陳倩儀