公務員事務局局長鄧國威話喎，公務員薪酬趨勢調查機制雖然唔完美，不過多年來行之有效，如果要另外設立調薪機制，改動好大，難度好高。
鄧國威搞乜鬼要講啲咁嘅嘢呢？原來係咁嘅，三個警察協會唔滿意今年嘅加薪幅度，認為人工加得唔夠多，宣布退出公務員薪酬趨勢調查機制，要求政府為警務人員另起爐灶，設置一個專為師兄師姐服務嘅獨立調薪機制。於是乎，鄧局長就講咗呢一番說話嘞，意思係人人應該跟大隊，冇人可以有特權。
公務員加薪幅度話高確係唔算高，話低其實又唔算低o架。行政會議決定參照薪酬趨勢調查結果，公務員高層加薪百分之二點五五，中層同低層劃一加薪百分之三點九二。曾經做過公務員事務局局長嘅行政會議召集人林煥光就話嘞，薪酬趨勢調查機制運作二十幾年，過往雖然試過有唔跟隨調查結果嘅例子，不過大多數係因為調查出現負數而決定全體凍薪，今年嘅調查結果係正數，而且中低層公務員嘅加薪幅度已經高過通脹，呼籲工會唔好稍有不滿就脫離機制。
簡單咁講，警務人員自視甚高，認為自己嘅工作性質非常之咁獨特，加薪幅度唔應該受到其他公務員職系拖累而拉低。之不過咁，警察工會似乎忘記咗一件事，警隊薪酬待遇一向係各大紀律部隊之冠，動不動就屁股左扭右扭跳草裙舞，難怪有人批評呢一種態度係「輸打贏要」，加得多嘅時候粒聲唔出，加得少就鬼殺咁嘈。
唉，其實計功夫茶話齋，九成係腐敗高官帶頭教壞下屬啦。呢嗱嗱嗱，前特首曾蔭權衰貪婪，前政務司司長許仕仁又係涉嫌衰貪婪，前廉政專員湯顯明更加係衰貪婪，正所謂上樑不正下樑歪，有啲人咪學到冇規冇矩囉，一於貪得無厭爭取異於常人嘅特殊加薪幅度，將行之有效嘅現有機制棄之如敝屣。
公務員薪酬趨勢調查機制唔可以另起爐灶，道理一字咁淺。若然警隊話獨立調薪就獨立調薪，消防處呢？懲教署呢？海關呢？萬一個個部門都扁嘴扭計嘈到拆天，唔通全部各自另起爐灶獨立調薪咩？唔好玩啦，不患寡而患不均呀，到時肯定天下大亂，加薪幅度無論幾多都會有人覺得唔公平。
好心師兄師姐唔好再爭拗落去啦，煩死人呀。相對於大多數私營機構，薪高糧準福利高嘅公務員待遇已經跑贏大市o架喇，即使今年加薪幅度未如理想，呻兩句咪算鬼數囉，唔好搞到破壞恒常機制咁大鑊吖嘛。請記住，香港可以冇領導，勝在辦事有制度，若然制度隨便作廢，咁就唔叫法治之區啦！