政情:公民講場:扮長者計錯數 長毛未老先衰咗

今年五十七歲嘅立法會議員長毛梁國雄尋日應邀出席一個防虐老活動,面對住一眾公公婆婆,可能為咗要埋堆同大家拉近距離,長毛不惜出招認老,自爆歲數,高呼自己三年之後都同台下嘅老友記一樣,會拎長者卡同有得兩蚊搭車咁話。佢諗住咁講可以反高潮,搞吓氣氛啦,點知台下真係如佢所料,全場勁有反應,笑聲不絕。立法會議員陳婉嫻、梁家傑同安老事務委員會前主席梁智鴻等人仲笑住糾正佢:「長者卡係六十五歲先拎得o架!」長毛自知老貓燒鬚惟有以笑遮醜,見到佢咁尷尷尬尬個樣真係好搞笑。