民政事務局局長曾德成放緊大假，依然勤力地於網上專欄撰文，尋日上載咗篇「局長隨筆」，講及科技大學華南研究中心剛剛完成對香港非物質文化遺產嘅普查工作，結果發現香港嘅非物質文化遺產好豐富，包括深受港人喜愛嘅奶茶。原來早喺一九○九年嘅報章已有「牛奶茶」嘅廣告，亦因奶茶有一套製作嘅知識體系，屬於「世代相傳」而列入清單。
據悉，呢次普查自○九年起，用咗三年半時間完成，調查嘅近八百個個案中，共有四百七十七個獲得非物質文化遺產諮詢委員會建議列入清單擬稿。曾德成好驚訝，香港面積咁細，竟然保存咗咁多非物質文化遺產，證明香港確係個包容並蓄嘅地方。
曾德成坦言，以上項目存在唔少隱憂，喺全球經濟商業化衝擊下，漁民嘅嘆歌同鹹水歌、古琴製作等民間藝術嘅承傳人年事已高，後繼無人；牙雕、曬鹽、雨傘製作等傳統行業亦已式微。佢認為，要承傳呢啲文化，除咗傳授技術之外，仲要營造一個欣賞並接受傳統技藝嘅環境，改變大家對「傳統」等於「落後」嘅觀感。但最緊要嘅係，曾局長，你可以做啲乜呢？