每年端午節，旅遊發展局都會喺尖沙咀海旁舉行國際龍舟邀請賽，另加由社會各界組成嘅名人划浴缸比賽。繼身形同身家一樣咁豐厚嘅金融服務界議員張華峰（峰爺）唔怕沉船報名挑戰身手後，陳恒鑌（Ben）同單仲偕（騸雞）原來都已經組隊參加，尋日仲聯同教練去沙田城門河試試划浴缸。
對於峰爺諗住扮橡皮鴨坐浴缸贏取最佳打扮獎，阿Ben就話自己都已經決定好當日裝扮，誓要撼低肥鴨峰爺捧走獎盃。無論點樣嚴刑逼供，阿Ben始終封口唔肯透露半點風聲，淨係預告當日會「少布」上陣，又大賣關子話為咗贏出比賽，佢同隊友已經將所有底線拋諸腦後。
騸雞尋日喺練習期間跌咗落水，佢解釋當時因為想向左移坐得舒服啲，稍一不慎就跌落海飲咗幾啖海水，又話後日比賽一定唔會再亂郁，相信自己會安全到達彼岸。雖然騸雞口話唔想變落湯雞，但佢當日將會扮成小學雞搶鏡，因為小學雞同佢嗰花名襯到絕一絕。