政情：佔中商討日 全場無英文
「讓愛與和平佔領中環」尋日舉行首場商討日，尋日嘅氣氛相當和諧，大家交流下意見、唱下歌、拍下手，全場瀰漫住愛與和平嘅氣氛，得出一啲「阿媽係女人」結論，不知幾包容。面對與會者種種質疑，佔中三子都持開放態度照單全收。不過，係呢個咁包容嘅氣氛之下，有人就忽然彈起話，點解全場無英文，而融樂會總幹事王惠芬亦覺得有少少唔多妥，點解？因為場上好似無咩少數族裔代表喎！
尋日參與商討嘅，幾乎全場都係黃皮膚黑眼睛嘅人，唯一嘅少數族裔可能要數到中國巴基斯坦混血兒碧樺依（Raees）。Raees嘅工作關注少數族裔權益，對少數族裔訴求有一定認識，喺香港土生土長、仲講得一口流利嘅廣東話，其實係標準嘅香港人。唔通喺香港嘅其他外籍人士唔爭取民主？
尋日嘅商討日結果爆滿有近八百人參加，不過原來「佔中十子」就未有到齊，據運動發起人之一陳健民話，醫生吳錦祥、資深傳媒人徐少驊就無到場，而口口聲聲愛民主嘅民主阿婆陳方安生同民主黨創黨主席李柱銘，都唔多覺眼。