政情：「俊」步停滯港人自求多福
瑞士洛桑國際管理學院（IMD）最近發表《2013年世界競爭力年報》，香港排名由去年首位滑落至第三，本來呢個係好時機，畀港府重新檢視點樣提升本港競爭力，點知財政司司長曾俊華（鬍鬚曾）竟然自我感覺良好，特別搵番十一年前嘅數據做比較，直指相比○二年喺IMD排名十三，近年其實一直拾級而上，今年雖然排名下跌但仲係亞洲第一。呢位財爺咁不思進取，睇怕七百萬市民真係要自求多福喇！
只懂 「報喜不報憂」
其實領導人都不約而同提醒香港要提高競爭力，主管港澳事務嘅全國人大委員長張德江，早於今年四月底警告香港經濟發展深層次矛盾逐漸顯現，一些競爭優勢正開始弱化，情況猶如「逆水行舟，不進則退」，殊不知張德江話口未完，最近IMD發表嘅《2013年世界競爭力年報》，連續兩年排名首位嘅香港，下跌兩級至第三位，鬍鬚曾喺最新網誌中主動提到呢個情況，不過繼續「報喜不報憂」。
鬍鬚曾首先話九七回歸以來，香港嘅整體競爭力其實係向上而非下滑，之後又歸咎香港今年排名下跌同亞洲經濟放緩有關，其實IMD對香港嘅整體評價仍然不俗，尤其係國際貿易及投資、商業法例及技術基建方面，都有正面評價。
否認產業單一化
雖然鬍鬚曾口講無意讓大家以為政府「不思進取、滿於現狀」，但事實上佢有為香港經濟停滯不前諸多辯護嘅痕迹，一方面話四大支柱發展無停下來「食老本」，又否認本港產業單一化、過分側重金融和地產；不過同一時間，鬍鬚曾又認同本港產業可以更多元化，並指新產業需要時間孕育同市場洗禮，所以不可能喺數年間發展到四大支柱的規模，似乎有意為過去多年新興產業發展緩慢搵下台階。
鬍鬚曾喺網誌末段，更引用已故著名填詞人黃霑嘅歌詞「知否世事常變，變幻原是永恒」，直指歷史證明靈活變通正是香港競爭力的核心，只要「經得風浪起跌」，「必將惡運變好運」。話時話，鬍鬚曾連番言論好似當中央嘅溫馨提示透明，亦疑似點極都唔醒，工商界同普羅市民為切身利益着想，隨時要有為自己諗計提升自身競爭力嘅準備喇！