龍舟鼓響，糉子飄香，一年一度嘅端午節又到喇。大家都知糉係端午節嘅應節食品，但又知唔知糉其實唔可以亂食嘅呢？
功夫茶唔係靠嚇o架。呢，本報近日喺本港和內地市面購買六款糉葉交畀化驗所檢驗，結果全部驗出含重金屬銅，其中一款購於旺角街市附近雜貨店嘅糉葉，每公斤含銅量高達五百九十五毫克，超出內地過去所訂標準十一倍。糉葉含銅有乜後果？專家指出，糉葉含銅「一毫克都嫌多」，事關銅經高溫蒸煮可滲入糉內，人體攝取過量銅隨時傷肝傷腎，甚至可能損害神經系統，造成永久性損害，唔排除有不法商人以硫酸銅等工業原料浸泡糉葉，令賣相更翠綠，置消費者健康於不顧。
為咗進一步求證，記者根據專家教路，將六款糉葉放喺清水中浸泡一晚，其中購自旺角街市附近雜貨舖嘅一款散裝糉葉及一款內地糉葉，均出現甩色情況，清水被染成綠色，證明專家嘅猜測完全正確。有人稱之為「綠衣陷阱」，防不勝防，真係一啲都冇誇張。
依家化驗結果有嘞，當局又有乜反應呢？食物安全中心話喎，由二○一○年初至今年五月，共抽取四百三十個糉樣本做微生物及化學測試，結果全部滿意，其中十五個樣本檢測含銅量，同樣全部滿意。你信唔信吖？其實，所謂全部滿意，純屬講人自講，港府並無就食品中銅嘅含量訂定上限，毫無標準可言，就算含銅量爆晒燈，當局都可以大大聲話滿意喇。
最九唔搭八嘅係，食安中心呢頭聲稱銅唔屬於影響公眾健康嘅污染物，毋須訂定標準，嗰頭又指攝取銅可能會出現腹瀉、嘔吐及黃疸病等，可謂自打嘴巴。正如專家話齋，銅根本唔應該喺食物鏈上出現，驗出有一毫克都唔合理，絕對不能容許！
嗱，呢啲先至係專業吖嘛。事實證明，本港食品安全條例漏洞百出，早就不合時宜。今時今日問題食品層出不窮，化學添加劑氾濫成災，大陸係咁，台灣亦係咁，五十步笑一百步，香港夾喺中間都幾難獨善其身。最弊港產官僚後知後覺，次次都要等出事先至補鑊，孔雀石綠、蘇丹紅、三聚氰胺、塑化劑……冇一次唔搞到七國咁亂。今次本報踢爆綠衣陷阱，連專家都感到震驚，而當局仲若無其事咁，簡直冥頑不靈。咪話功夫茶唔提醒吖，既然食安中心亦認為攝取銅可能出現腹瀉、嘔吐等徵狀，咁係咪要考慮制訂含量標準呢？
講起都幾無奈o架，端午節食糉本來係為咗紀念屈原，依家搞到連糉葉都有毒，如果屈原在天有靈，都唔知食唔食好！