政情：林煥光爆考大學兩失手
前平等機會委員會主席林煥光（WK）上年兼任行政會議召集人搞到滿城風雨，但佢一於兵來將擋，四十年政府工作經驗絕對唔可以睇小。不過，原來WK當年能夠大學畢業，係源於一個「死要面」嘅決定，更改變咗佢嘅一生。
勸勉DSE考生勿放棄
WK尋日出席電台活動，勉勵應屆文憑試（DSE）考生唔好輕言放棄。佢致詞時話，回想當年考咗兩次大學都敗北而回，考到第三次已經好灰心，想話考唔到就出嚟做嘢算數。但到考試當日，WK考完上半場自覺零比三輸晒，諗住今次「衰硬」，步出試場就同同學仔商量不如下半場去睇戲好過。
不過，年少氣盛嘅WK自覺考咗咁多次都未試過中途放棄、淪落到要「擔梯」攞Ｈ嘅評級，佢為咗唔想張沙紙出到嚟唔好睇，把心一橫決定考埋下半場。就係呢一念之差，佢最後四比三反勝完場，入讀香港大學社會科學系，畢業後順利加入政府做政務主任（AO）。
另外，食物及衞生局局長高永文尋日出席保良局一個領袖培育計劃活動時，就即場分享教仔心得，佢話管教仔女最緊要「自由」，畀仔女發揮潛能。好似佢當初都逼兩個仔學踢波，點知佢哋冇乜興趣，反而一個鍾意打羽毛球，一個學緊無伴奏式唱歌，玩得好投入，所以勉強冇幸福喎。