政情：辣慶建制吳得掂

稱師生佔中 不秋後算帳

據了解，佔中行動有可能觸犯《公安條例》及相關法例，但作為本港教育政策最高決策人嘅吳得掂，今年三月竟公開講明，教師同學生去參加佔中，當局都唔會秋後算帳。聽聞直至依家，有建制派人士一提起吳得掂個名，即時咬牙切齒，話之前啲政策點樣臨到最後一刻飛起佢哋都算數喇，但竟然連佔中呢件「明顯」犯法嘅行為都講到好似冇所謂咁，等於間接鼓勵教師同學生參加佔中行動咁話。

商地區政策 寧見楊潤雄

唔知係咪呢個原因，有建制派早前搵教育局商討地區政策時，寧願見副局長楊潤雄，都唔肯見吳得掂，有啲建制派地區人士仲話，同吳得掂冇乜偈傾喎。其實政界早就有傳聞話，港府政策局局長有後備計劃，即係萬一局長真係要落台嘅話，就由副手頂上。所以有建制派人士形容，呢個情況就好似一場足球賽，唔怕有神級對手，只怕隊中有守護唔到龍門嘅後衞，呢啲後衞早就要換走啦！

其實早前當吳得掂外訪時，楊潤雄就喺香港打點好晒北區跨區學位，以及公布返回機制嘅事情，莫非政府真係準備喺教育局實施Plan B？官場中人都知道，楊潤雄係醒目仔一名，做過地區民政事務專員、民政事務局、食物及衞生局等，相信啲烏龍嘢極少會發生喺佢身上。不過，無論換人傳聞屬真屬假，作為政策局官員，如果連自己個位置都唔清楚，開口夾着脷，又同支持者關係搞到咁僵，以後做事就倍艱難，睇嚟吳得掂真係要檢討吓喇。