中環出更：「北斗七星」推動文藝體育
前仁濟醫院主席鄭承隆（Edwin）三月底落莊後，愈嚟愈唔得閒，事關身為新民黨副主席嘅佢，唔只投入地區工作，仲夥拍志同道合嘅六名老友，組成北斗基金，以推動文化藝術及體育活動。呢班「北斗七星」除咗Edwin之外，仲有仁濟醫院副主席馮卓能（Clement）、總理鮑誠業及黃美斯等人。早前Edwin請班手足飯敍，一邊籌謀未來發展大計，一邊推介歎佢至愛嘅北京烤鴨、腐乳芝士餅等特色甜品，又傾又食相當盡興。
馮卓能搞龍舟賽冇返屋企
擔任基金主席嘅Clement一向熱愛運動，佢話基金啱啱贊助舉辦荃灣區龍舟競渡賽，係該區暫停十幾年後首次恢復舉辦，共有逾九十支隊伍報名參賽。當日海上有賽事，岸上有嘉年華，選手及街坊都玩得極盡興。為咗籌備今次活動，個個忙到無時停，Clement更加成個星期冇返屋企，好彩回響熱烈，幾辛苦都值得啦！身為佛教徒嘅黃美斯就話，正籌備同西方寺合作舉行浴佛節活動，希望藉此化解社會戾氣，喚起市民嘅慈悲心。
卓妮