中環出更：雷禮權有創意 車牌似足「KMB」
九巴董事雷禮權（William），除衣着打扮夠創意，連座駕都與眾不同。卓妮早幾日喺中環遇到William離開香港會所，正準備登上座駕。不過，佢坐嘅座駕並非一般私家車，而係英國LandRover Defender 110銀灰色越野四驅車。該車車牌「KM8」亦都別出心裁，遠睇似足九巴嘅英文縮寫「KMB」，右上角更印有九巴標誌，勁盞鬼。
當日下午約兩點鐘，戴住墨鏡、Gel晒頭嘅William食完午飯，由香港會所徐徐步出，此時佢嘅司機早已將野性嘅四驅車停泊於門外等候。香港會所外出現呢部咁高身嘅四驅車，途人都忍唔住望多幾眼。
全銀色裝束 人車合一
一身銀色西裝、銀色皮鞋嘅William，明顯係想襯番四驅車隻灰色，簡直達到人車合一嘅境界。不過，唯一要扣分嘅係，佢搵咗司機代揸架車，如果由佢自己揸番，相信會更加型仔囉！
卓妮上前同William打招呼，讚佢架車好搶眼，豪爽嘅佢即笑笑口咁話：「架車好平㗎咋！」又話架車只係落地幾個月。我翻查資料，呢款車新車價都只係賣四十多萬元，又的確幾平嘅。
嚟緊暑假，William話會飛去英國探吓愛兒，佢好感慨話，個仔八歲去英國讀書，轉眼間已經二十歲，長大成人喇！難得William面上依然毫無歲月嘅痕迹，保養得真係好。
卓妮